कर्णाली प्रदेशको राजधानी वीरेन्द्रनगर मा निर्माणाधीन ‘वीरेन्द्रनगर चक्रपथ’ सुरु भएको करिब दुई दशक पुग्न लाग्दासमेत पूर्णता पाउन सकेको छैन । आर्थिक वर्ष २०६२/६३ मा सुरु गरिएको चक्रपथ निर्माण कार्य २०८२ सालसम्म आइपुग्दा पनि जग्गा विवाद, वन क्षेत्रको अवरोध र क्षतिपूर्ति सम्बन्धी समस्याका कारण अधुरै बनेको हो ।

सुब्बाकुनादेखि घुस्रा हुँदै दक्षिणी क्षेत्रबाट बाङ्गेसिमल जोड्ने उद्देश्यले सुरु गरिएको करिब २९ किलोमिटर लामो चक्रपथको हालसम्म अधिकांश क्षेत्रमा ट्र्याक खुले पनि सबै खण्डमा निर्माण सम्पन्न हुन सकेको छैन । पछिल्ला विवरणअनुसार करिब २४ किलोमिटर क्षेत्रमा मात्रै ट्र्याक खोलिएको छ भने केही स्थानमा कालोपत्रको काम अझै बाँकी छ ।

स्थानीय बासिन्दाको घरजग्गा सडक क्षेत्रमा परेका कारण सुरुदेखि नै विवाद हुँदै आएको छ । विशेषगरी वडा नम्बर १, २, ८, १० र १२ क्षेत्रमा जग्गा अधिग्रहण तथा क्षतिपूर्ति विवादका कारण निर्माण कार्य प्रभावित बनेको हो । स्थानीयवासीले उचित क्षतिपूर्ति नपाएसम्म सडक विस्तार हुन नदिने अडान राख्दै आएका छन् ।

चक्रपथअन्तर्गत केही भाग संरक्षित वन क्षेत्रमा समेत पर्ने भएकाले वनसम्बन्धी कानुनी प्रक्रिया अर्को चुनौती बनेको छ । सडक डिभिजन कार्यालयका अनुसार वन क्षेत्र र बस्ती क्षेत्रका विवाद समाधान नहुँदा निर्माणले गति लिन सकेको छैन ।

निर्माणको जिम्मा पाएको सडक डिभिजन कार्यालय चौरजहारी, रुकुम–पश्चिमले पटक–पटक म्याद थप गरे पनि लक्ष्यअनुसार काम पूरा हुन सकेन । सुरुमा २०७६ चैतभित्र सम्पन्न गर्ने लक्ष्य राखिएको आयोजना दुई पटक म्याद थप हुँदा पनि सम्पन्न हुन नसकेको हो । पछिल्लो सम्झौता अवधि सकिएपछि निर्माण कार्य केही समय रोकिएको समेत बताइएको छ ।

सडकको चौडाइसमेत प्रारम्भिक योजनाअनुसार कायम रहन सकेन । सुरुमा १५ मिटर चौडा बनाउने लक्ष्यसहित सम्झौता गरिएको भए पनि पर्याप्त जग्गा अभावका कारण कतिपय क्षेत्रमा सडक ११ मिटरमा सीमित भएको छ ।

सडक डिभिजन कार्यालयका अधिकारीहरूले विवाद समाधान भए बाँकी काम छिट्टै अघि बढ्ने बताएका छन् । यता वीरेन्द्रनगर नगरपालिका ले पनि सरोकारवाला पक्षबीच छलफल भइरहेको र प्रभावित नागरिकलाई मर्का नपर्ने गरी सहमतिमै काम अघि बढाउने जनाएको छ ।

प्रदेश राजधानीको दीर्घकालीन सहरी विकास, यातायात व्यवस्थापन तथा भविष्यको विस्तारलाई ध्यानमा राखेर सुरु गरिएको ‘वीरेन्द्रनगर चक्रपथ’ निर्माण अझै अनिश्चित बनेको छ । स्थानीयवासी भने विकास आवश्यक भए पनि आफूहरू विस्थापित हुने गरी आयोजना अघि बढाउन नहुने बताउँछन् ।

२० वर्ष पुग्न लाग्दासमेत प्रदेश गौरवको आयोजना मानिएको चक्रपथ निर्माणले पूर्णता नपाउँदा वीरेन्द्रनगरको सहरी व्यवस्थापन र यातायात सुधारको योजना अझै अधुरै बनेको छ ।